गोरक्षकांचा "गोरखधंदा" आणि कुरैशी समाजाचा मास्टरस्ट्रोक
ए बाबा, काय चाललंय हे महाराष्ट्रात? एकीकडे गाय मातेची भक्ती, दुसरीकडे गोरक्षकांचा "खंडणीधंदा" आणि आता कुरैशी समाजाने टाकलेला असा बॉम्ब की, या तथाकथित गोरक्षकांचे धाबे दणाणले! चला, थोडं हसूया आणि या सगळ्या नाटकात काय घडतंय ते पाहूया....
काही "गोरक्षक" मंडळींनी गायीच्या नावावर धंदा चांगलाच जोमात आणला होता. गाय माता आहे, तिचं रक्षण करायचं, बरोबर ना? पण हे लोक गायीपेक्षा जास्त आपल्या खिशाकडे लक्ष देत होते. जनावरं विकणारे, वाहतूक करणारे, मटणाचा व्यवसाय करणारे कुरैशी बांधवांना टार्गेट करायचं. रस्त्यावर गाडी अडवायची, "गायीची तस्करी करतोय का?" असं बोंबलत धमकावायचं आणि मग? मग काय, "सेटलमेंट" नावाचा जादुई शब्द! "दे दहा हजार, नाहीतर गायीच्या नावावर तुला जेलमधे टाकतो!" असं म्हणत खंडणी वसूल. काही ठिकाणी तर गुन्हेही दाखल झालेत, पण या गोरक्षकांचा धंदा थांबेना. गाय मातेच्या नावावर हे बाबा आपलं बँक बॅलन्स वाढवत होते, आणि गाय? ती बिचारी रस्त्यावर प्लास्टिक खात फिरत होती!
आता कुरैशी समाज म्हणाला, "बस्स, आता झालं!" 8 जुलै 2025 ला नागपूरच्या कामठीच्या सभेत त्यांनी ठरवलं, "आम्ही आता जनावरं खरेदी करणार नाही, कत्तल करणार नाही, आणि मांस विक्रीचा धंदाच बंद!" अरे, हा तर गोरक्षकांच्या पोटावर लाथ मारल्यासारखा निर्णय! कारण कुरैशी बांधवांनी पशु बाजारातून हात आखडता घेतला तर या गोरक्षकांचा "खंडणी धंदा" कसा चालणार? रस्त्यावर गाडी अडवायला गाडीच नसेल, मग कुठून वसूल करणार पैसे? आता हे गोरक्षक बाबा रस्त्यावर "गाय माता की जय" म्हणत फिरतायत, पण खिसा रिकामा झालाय. म्हणतात ना, "ज्याचं काम त्याला सजेल, बाकी सगळे बोंबलत बसतील!"
आता या गोरक्षकांचं काय हाल झालंय बघा. एक बाबा रस्त्यावर बसून म्हणतो, "अरे, आता कुरैशी लोकांनी धंदा बंद केला, मग आम्ही कुठे जाऊ?" दुसरा म्हणतो, "काय माहिती, चल गायींना चाराच घालूया!" पण चाराही तर विकत घ्यावा लागतो, आणि खंडणी बंद झाली तर पैसे कुठून? काही बाबांनी तर आता नवीन धंद्याचा विचार सुरू केलाय. एक बाबा म्हणाला, "चल, आता कुत्र्यांचं रक्षण करूया, त्यांच्याही नावावर खंडणी मागू!" पण कुत्र्यांनी ऐकलं तर त्यांनीच भुंकून हाकलून लावलं असतं!
कुरैशी समाजाने खरंच गोरक्षकांचा खेळ उध्वस्त केलाय. त्यांनी म्हटलं, "तुम्ही गायीच्या नावावर आम्हाला त्रास देणार? मग आम्हीच तुमचा धंदा बंद करतो!" आता हा निर्णय संपूर्ण महाराष्ट्रात लागू झालाय. पशु बाजारात शुकशुकाट, आणि गोरक्षकांचे चेहरे लटकलेत. कुरैशी समाजाने एकप्रकारे गोरक्षकांना सांगितलं, "तुम्ही गायीचं रक्षण करायचंय? मग करा ना, पण आम्हाला त्रास द्यायचा थांबवा!" आता शेतकरीही विचारात पडलेत, कारण त्यांची जनावरं विकायची कुठे? पण कुरैशी समाजाने एकच गोष्ट स्पष्ट केली – "आम्ही कायद्याच्या चौकटीत काम करतो, पण तुमच्या खंडणीला कंटाळलो!"
आता या गोरक्षक बाबांचं काय होणार? काहींनी तर गायींच्या नावावर "NGO" काढायचा प्लॅन केलाय, पण त्यातही खंडणीच वसूल करायची तयारी आहे! एक बाबा म्हणाला, "आता ऑनलाइन गोरक्षा सुरू करू, डोनेशन मागू!" पण बिचारे विसरले की, इंटरनेटवरही लोक त्यांना ट्रोल करतील. कुरैशी समाजाच्या या निर्णयाने गोरक्षकांचा "गोरखधंदा" बंद झालाय, आणि आता त्यांना खऱ्या गोरक्षेचा विचार करावा लागेल – म्हणजे गायींना चारा, पाणी, आणि गोठा देण्याचा!
कुरैशी समाजाने एकप्रकारे गोरक्षकांना आरसा दाखवला आहे. गायीचं रक्षण करायचं असेल तर करा, पण त्याच्या नावावर खंडणी वसूल करणं बंद करा! नाहीतर असंच कुरैशी समाजासारखे लोक तुमचा धंदा बंद करतील, आणि मग तुम्ही फक्त "गाय माता की जय" म्हणत रस्त्यावर फिरत राहाल, पण खिसा रिकामा!
-डॉ. रियाज़ देशमुख, एसीपी (रि), छत्रपती संभाजी नगर
